Daimh Na Cloinne

'S iad briathran fìor-ghlan Chrìosda

Thaobh clann nan gràs 'sa ghaoil

"Tha mise nise annta-san

Is tus annams' Athair Naomh;

Agus 'se chrìoch a dh'òrdaicheadh

A d'ghràdh, a Dhè, gan taobh

Gum biodh iad uile annamsa

Chan ann sgaraicht' ach nan aon".

'Se seo an seilbh 's na flaitheanas,

Neo cha b'e nèamh bhiodh ann

Mar dhream a mheal do bheannachadh

Tha iad ceangailt' ri aon cheann,

Oir 'se an eaglais a chorp dìomhair-san

Mas ann shìos iad no mas shuas

'S cha dealaich iad gu sìorraidh ris

Tha ghràdh da chèile buan.

Gearanach 's mar tha iad

Air cridhe tha cho cruaidh,

Tha dàimh aca rim bràithrean

Thar chàch am measg an t-sluaigh

Is ceangal e tha ion-mhiannaichte

Nach gabh a chuir an cèill

Is gu bràth cha chuirear crìoch air

Fhad's a dh'fhuireas Crìosd air nèamh.

Tha mòran nithean prìseil ann

Chan e mhàin gu mair e beò

A'chrìoch a th'aig gach neach aca

'S e comann bhuan an glòir,

Gidheadh bidh an seo ro-bhlas ac' air

An iomadh seòrsa dòigh

Tha sìth ac' thar na thuigeas iad

An comainn fear-nuadh pòsd'.

'S airson bhith luaidh air aoibhneas

Chan eil fìon, no cluich, no ceòl,

A dhealbhadh riamh air thalamh

'S am bheil idir buaidh dha sheòrs'

Tha comann dlùth ra chèile ac'

Ann an comann fhir an gràidh

Is buill da chorp 's da fheòil-san iad

A mhaireas beò 's a'bhàs.

'S tha seo cho beò aig uairibh dhaibh

'S gu saoil iad nach eil càil

Tha tighinn eadar iad 's a chèile

Ach an t-urram th'aca dha

Gidheadh tha dòchas fallain ac'

Nach sgarar iad an tìm

'S nuair a gheibh iad null thar Iòrdan

Gum bi sonas buan gun dìth.

'S e Crìosd 's am bidh iad ceangailte

'Se tobair làn a' ghràidh

'Se'n Tì gun cheisd a cheannaich e

Le ìobradh fèin na bhàs

Is e tha nis gan treòrachadh

Gu cuan a ghlòir 's a ghràidh

'S a chaoidh cha dèan iad aithreachas

Air son na thug iad dhà.

Tha clann Dhè air an cuairteachadh

'S an t-saoghal seo an dràsd'

Le iomadh cleachdadh gràineil

Is le beusan tha neo-ghnàthaicht'

'S chan eil ann ach aon seòrs' mìneachadh

Air a'chainnt' as àird' 's as fheàrr

Chan eil nì a tha ri fhulang ann

Cho mòr ri ceangal gràidh.

Tha inntinn thruaillidh shaoghalta

Ri dorchnachadh an là

Oir chan eil dàimh nan naoimh aca

Ach mar an clàbar air an t-sràid,

Cha b'e sin a chunnaic cuid againn

Oir b'aithne dhuinn bho ar n'òig'

Na daoine b'fheàrr san t-saoghal

Bhith le chèil' le aoibhneas mòr.