Am Bioball

Comhairlean bho Thòmas Uatson

Amhaircibh air an fhacal mar leabhar de sheòlaidhean spioradail.

Tha Basil a'comas an fhocail ri bùth lèigh, anns am biodh gach uile sheòrsa cungaidh-leighis. Ma mhothaicheas sibh sibh fèin marbh ann an dleasdanas tha seòladh an seo: "Bheothaich d'fhacal mi" (Salm 119:50). Ma mhothaicheas sibh ar cridheachan cruaidh, taisichidh agus leaghaidh am facal iad; uime sin samhlaichear am facal ri teine, a thaobh a chumhachd taiseachaidh, Ier.23:29. Ma tha sibh air ur puinnseanachadh le peacadh, tha ìocshlaint an seo a-chum a chuir air falbh.

Amhaircibh air an fhacal mar ìocshlaint bharraichte a-chum ur comhartachadh ann an àmhghar.

Bheir e sòlas dhuibh an aghaidh ar n-uile pheacaidhean, bhuairidhean agus àmhgharan. Ciod a th'anns na geallaidhean ach ìocshlaint nèamhaidh chum anama fann ath-bheothachadh! Tha cridhe gràsmhor a'beathachadh air a'ghealladh, mar a bha Samson a'beathachadh air a'chìr-mhealla, Breth. 14:9. Tha am facal a'toirt sòlas an aghaidh tinneas agus bàs: "O bhàis, càit a bheil do ghath?" 1 Cor 15:55. Bàsaichidh an Crìosdaidh a'glacadh a gheallaidh na uchd, mar a ghlac Simeon Crìosd, Lucas 2:25-32; Eabh. 11:16.

Leughaibh am facal mar thiomnadh deireannach Chriosd.

An seo tha mòran dhìleaban air an toirt dhaibhsan aig am bheil gràdh dhà; maitheanas peacaidh, uchdmhacachd agus sòlas. Tha an tiomnadh seo seasmhach, oir tha e air a sheulachadh ann am fuil Chrìosd. Ciod an aire dhùrachdach leis an leugh leanabh tiomnadh athair, a-chum 's gum faic e ciod a dh'fhàgadh dhà fèin!

Leughaibh e mar leabhar leis am feum breith a bhi air a thoirt oirbh.

"Am facal a labhair mi, bheir e sin breth air san là dheireannach", Eòin 12:48. Bidh iadsan a tha a'caitheamh am beatha a-rèir riaghailtean na leabhrach seo air an làn-shaoradh; ach iadsan a tha caitheamh am beatha nan aghaidh dìtear iad. Tha dà leabhar a ghnàthaicheas Dia, leabhar an cogais, agus leabhar an sgriobtair; bithidh an dara h-aon diubh na fhianais, agus an aon eile na bhritheamh. Ciamar ma-tà, mar bu chòir do gach Crìosdaidh e fèin a bhrosnachadh a-chum leabhar seo Dhè a leughadh le cùram agus cràbhadh! 'S ann a-rèir na leabhrach seo a thèid Dia mu dheireadh. A mhuinntir a tha teicheadh bhon fhacal mar riaghailt stiùraidh, feumaidh iad strìochdadh dha mar bhritheamh.

back