A'chaisg

Air a tharraing as an leabhran "Smuaintean mu bheatha Chriosd" leis an t-Urr. U.B. MacNeacail, nach maireann.

Shuidh Iosa sìos còmhla ri a dheisciobail air Diardaoin na Càisge, agus dh'ith iad a'Chàisg anns an fheasgar. A-rèir beachd cuid, chaidh Suipear an Tighearna a chur air chois le Criosd aig a'Chàisg, no an dèidh na Càisge. Is e a'chiad Chàisg ans an Eiphit a bu chudthromaiche a-measg fèillean na Iùdhach. Bha i air a cur air chois ann an làithean Mhaois, agus bha i a'comharrachadh a-mach saorsa clann Dhè bho dhaorsa na h-Eiphit. Bha i na h'ìobairt agus na cuirm, agus ann an dòigh a'gabhail a-steach nan ìobairtean uile, agus bha i na solas air ìobairt mhòr Chalbhari, a bha na bunait-teàrnaidh do chlann Dhè.

Tha eadar-dhealachadh eadar a'chiad Chàisg agus an dara Càisg. Tha Dr. Eidersheim ag ràdh: "aig an t-àm seo agus airson ceudan de bhliadhnachan bha a'Chàisg air an dòigh seo: trì breacagan mòra de aran neo-ghortaichte air am pasgadh ann an neapaicin agus air an cur air truinnsear. Agus a thuilleadh air a sin na sia nithean a dh'fheumadh a bhith air a'bhòrd - is e sin ugh; sùgh; uisge saillte; luibhean searbha; pìos uain; leatas; seirbhil agus pàrslaidh.

"Is e cleachadh nan Iùdhach gun gabhadh ceann an teaghlaich a'chiad chupan fìon; agus an dèidh taing a thabhairt bheireadh e am fìon do chàch, gus an dèidh an làmhan a nighe, sheinneadh iad a'chiad Hallel (Salm 113-114). An dèidh sin dh'itheadh iad na luibhean searbha; agus an uair sin bha a'Chàisg air a mìneachadh. An sin ghabhadh ceann an teaghlaich an greim agus thumadh e anns a'mhèis e. is e an greim pìos de aran neo-ghortaichte, agus luibhean searbha. Gheibheadh gach neach pìos den uan Càisge, sheinneadh iad an dara Hallel (Salm 115-118) agus chrìochnaicheadh iad le ùrnaigh.

Tha Dr Eidersheim ag ràdh gur e ithe an arain toiseach na Càisge. Mas fìor sin, cha do ghabh Iùdas compàirt anns a'Chàisg no anns an t-Suipear, oir an uair ghabh e an greim chaidh e a-mach air ball. Ach chan eil sinn cinnteach as na nithean sin. Tha e air ìnnse dhuinn gu robh an t-aran air a dhèanamh de eòrna, coirc, seagal is spelt, agus air mheasgadh le uisge. Bha na luibhean searbha a'gabhail a-steach leatas, endibh, succori agus horehound. Bha an sùgh air a dhèanamh le cnothan, fìgisean agus measan eile.

back