An Calaman - Eaglais Chriosd

Chaidh na rannan seo an sgrìobhadh le Mgr Aonghas Ailig Coineagan à Scalpaigh. Tha sinn a'toirt taing don t-Urr. Aonghas Macleòid as an Rudha airson an cuir thugainn.

A chalamain tha iomradh ort

Gu tric am facal Dhè;

Gu sonraichte anns an Dàn

'S tu air do shamhlachadh ri chèil

Is tusa mo bhean choileanta

Tha Crìosda cur an cèill

Gu bràth cha dèan mi dìmeas ort

'S Chan fhàg mi thu 's cha trèig.

Chuir Noah mach am fitheach

Air uinneig àrd na h-àirc,

B'uamhasach an sealladh

Air na dh'amhairc e san là

Gidheadh b'e eun neò-ghlan a bh'ann

Bha beathachadh air bàs,

Is tuilleadh cha do thill e

Fhuair e riarachadh da chàil.

Cha b'ionnan sin 's an calaman

A chaidh a-mach na dhèidh,

Cha d'fhuair e àit a chos chuir fodha

Cha robh beathachadh ann dha

Ach thill e dh'ionnsaidh sàbhailteachd

A ghleidheadh dha san àirc

Mar anam glan an fhìrein

Gu shuaimhneas is gu thàmh.

Chuir Noah mach an dara uair

An calaman cho caomh

Cha b'fhada gun do thill e

Le teachdaireachd na bheul

Bha duilleag den chraoibh ola

Gu tèarainte aig an grèim

Mar shamhla air an t-Slànaighear

A thàinig le deagh sgeul.

Is lionmhoire na teagasgan

Tha dhuinn san duilleig bhig

Ag innse dhuinn mu thròcair Dhè

A mhaitheanais is iochd

Ag innse dha na bha san àirc

Nach b'fhada bhiodh iad innt'

Gu robh corraich Dhè air traoghadh

Mar na tuiltean bha 's an cinn.

Bu mhath a bhi 's a chomann ud

Anns an t-seòmar broinn na h-àirc

Ag èisdeachd cànradh 's conaltradh

Mu thimcheall na ghabh àit'

Gun deach a gheug a spìonadh

A craoibh a bh'air ùr fhàs

Is Dia a-nis 'g ath-nuadhachadh

Le beatha far nach robh ach bàs.

Tha do ghuth leis binn is tìomhaidh

Is t-aogais maiseach rèidh

Is miann leis bhi ag èisdeachd riut

's ag amhairc ort da rèir

Is aithne dhuit an t-àit'

Ann an ionad dìmhair àrd

'S an sgoltadh anns a'charraig ud

Gad dhìon gu bràth bhon nàmh.

Tha thu dìleas dha do chompanach

Is dèidheil air a chloinn

Tha thu gràdhachadh do nàbaidhean

'S do naimhdean mar an ceudn'

Don acrach tha thu tabhairt biadh

'S don tartmhor deoch ra òl

Cha dean thu idir dìoghaltas

Bheir thu buaidh le maith air olc.

B'e an calaman an ìobairt

Bha aig an duine bhochd

Toirt tabhartais a dh'ionnsaigh Dhè

A bha gun smal na lochd

B'e dhà dhiubh bha aig Iòseph

Is aig Muire màthair Ios'

Nuair thàinig an t-àm coileanta

Airson a thaisbeanadh don triath.

Tha na ceithir shoisgeulaich

Toirt fianais air do thaobh

An là a bhaisteadh Crìosd

le Eòin a ròghnach e

Bha'n Spiorad Naomh a'tuirling

Mar chalaman air a cheann

'S guth bho nèamh a'glaodhaich rinn

Mo Mhac gràdhach fèin a th'ann.

O anam dè an t-iarrtas

Tha air do shiubhal fèin

An e bhi beò air plaosgan

mar am fitheach tha gun chèill

An e biadh a chalamain

Is miann leat aig gach tràth

Smior na cruithneachd ithidh e

'S air a chogal nì e tàir.

O anam nach dèan thu roghainn

Mar rinn Muire an deagh àm

Thig maille ris na calamain

Is fàg na fithich thall

Is meallaidh tu na geallaidhean

'S bi d'àite deiseil ann

Aig deas làimh Rìgh na Glòire

Le mòr shubhachais nach gann.

back